سرینگر، یکم دسمبر : چمپئنز ٹرافی کرکٹ ٹورنامنٹ کے تیسرے ایڈیشن کا فائنل میچ بدھ کے روز یہاں ٹی آر سی گراؤنڈ میں کھیلا جائے گا۔
کرکٹ فریٹرنٹی ڈل گیٹ کی طرف سے منعقدہ اس ٹرافی کے فائنل میچ میں صوفی برادرس کا مقابلہ کشمیر جم خانہ کے ساتھ ہوگا۔
دونوں ٹیموں کے کوچز کا کہنا ہے کہ وہ فائنل میچ کھلینے کے لئے مکمل طور پر تیار ہیں۔
بتادیں کہ ٹرافی کے پہلے سیمی فائنل میچ میں صوفی برادرس نے شیپ آف فٹنس کو 96 رنوں سے شکست دے دی تھی جبکہ دوسرے سیمی فائنل میچ میں کشمیر جم خانہ نے عربی جیلورس کو 83 رنوں سے ہرا کر فائنل میں اپنی جگہ پکی کی تھی۔
اس ٹرافی میں وادی کے مختلف علاقوں سے تعلق رکھنے والی کل 32 ٹیموں نے حصہ لیا تھا۔
کرکٹ فریٹرنٹی ڈل گیٹ کے ایک رکن جاوید احمد بٹ نے بتایا کہ ان کرکٹ ٹورنامنٹس کے انعقاد کا مقصد وادی کے کرکٹ کھلاڑیوں کی صلاحیتوں کو نکھارنا اور ان کے لیے ایک پلیٹ فارم فراہم کرنا ہے۔
انہوں نے کہا کہ وادی کشمیر کے کھلاڑیوں میں ٹیلنٹ کی کوئی کمی نہیں ہے لیکن اس کو نکھارنے اور صحیح سمت دینے کی اشد ضرورت ہے۔
یو این آئی