ولہ بہہ میہ نش بہ ونے

ولہ بہہ میہ نش بہ ونے، دلکی زار لتیے
میہ زخم اکہ کھوت اکھ چھم،چھکھ ما شمار لتیے

ییم نا از میہ خوابی ،بنہ ہیم غمن شأدی
جان کرہا فدا تس، میہ چھم امار لتیے

سرمہ چشمے بمبہ کمان، نوان چھم دین و ایمان
زنجیر زن چھم نألی ، زلف شہمار لتیے

جانان نیوتھم ہوش، زارن تھاوم گوش
لوگہ تھم سنگ دل آدن، کورنم پزپار لتیے

دوہ چھم دوان اوری، زانہہ نے یوان یوری
کرس کوت میہ ون آخر، بہے انتظار لتیے

ییم نے ، بہ چاو کس، بئر بئر پیالنی مس
مایے تہندے میہ مسولہ، کھوتمُت خمار لتیے

فراقن وولہ نم نال، شباب گوم پامال
میہ باغ اوس پھولمُت ، دیتنس نار لتیے

چشمہ لگتھ در برنے، پراران یار سنز خبرے
بلان چھا کنہ جایہ میہ ون، لولہ بیمار لتیے

بہ منسوب تہندے ناوے، چھم دوان لوکھ پامے
تراوتھ گوم منز وتے، بہ کرئنس خار لتیے

عمر بوز یورچ کتھا، ما کر پان فدا
سہ چھی بے آر صنم، تس نے آر لتیے

ولہ بہہ میہ نش بہ ونے، دلکی زار لتیے
میہ زخم اکہ کھوت اکھ چھم،چھکھ ما شمار لتیے
عمر مشتاق عاؔقب
چاڈورا بڈگام