منوج سنہا گجر بکروال طبقے کے رہائشی ڈھانچوں کی انہدامی کارروائیوں کو روکیں: محبوبہ مفتی

سری نگر، 17 نومبر : پی ڈی پی صدر اور سابق وزیر اعلیٰ محبوبہ مفتی نے جموں و کشمیر کے لیفٹیننٹ گورنر منوج سنہا سے اپیل کی ہے کہ وہ یونین ٹریٹری میں گجر بکرال طبقے کے لوگوں کے رہائشی ڈھانچوں کی انہدامی کارروائیوں کی روک کو یقینی بنائیں انہوں نے کہا کہ یہ لوگ اصلی باشندے ہیں اور انہیں امتیازی بنیادوں پر بے دخل کیا جا رہا ہے۔
بتادیں کہ محکمہ جنگلات نے جموں و کشمیر میں ہائی کورٹ کے روشنی ایکٹ کے متعلق حکمنامے کے تحت جنگل اراضی کو چھڑانے کی کارروائیاں شروع کی ہیں۔
محبوبہ مفتی نے اپنے ایک ٹویٹ میں کہا: ‘جموں و کشمیر میں خانہ بدوشوں کو بے گھر کرنے اور انہیں ہراساں کرنے کی کارروائیوں سے مایوسی ہوئی۔ یہ لوگ اصلی باشندے ہیں اور انہیں امتیازی بنیادوں پر بے دخل کیا جا رہا ہے۔ منوج سنہا صاحب سے گذارش ہے کہ وہ مداخلت کر کے ان کارروائیوں کی روک کو یقینی بنائیں’۔
قابل ذکر ہے کہ محبوبہ مفتی نے گذشتہ روز ضلع اننت ناگ کے پہلگام کے لدرو علاقے کا دورہ کیا اور وہاں محکمہ جنگلات کی طرف سے گجر بکروال طبقے کے لوگوں کے زمین بوس کئے جانے والے رہائشی ڈھانچوں کا جائزہ لیا اور متاثرین کے ساتھ بات چیت بھی کی۔
اس موقع پر انہوں نے میڈیا کو بتایا کہ مرکزی حکومت جموں وکشمیر میں گجر اور بکروال طبقے سے وابستہ لوگوں کے رہائشی ڈھانچوں کو زمین بوس کر کے یہ جنگل اراضی اپنے ان سرمایہ کار دوستوں کو دینا چاہتی ہے جو ان کی مالی مدد کرتے ہیں۔
یو این آئی