بھائی چارہ اور یکجہتی کی کوششیں قابل ستائش۔مفتی اعظم جموں وکشمیر

سرینگر جموں کشمیر کے مفتی اعظم اور مسلم پرسنل لاء بورڈ کے چیئر مین مفتی ناصر الاسلام نے آج بلال کالونی صورہ،شاہ فیصل کالونی اور خلیل کالونی کے وفود سے ملاقات کی۔جن میں ان علاقاجات کے مقتدر افراد نے شرکت کی۔
وفود نے مفتی اعظم کو اُ ن کوششوں کے بارے میں آگاہ کیا جو باہمی یکجہتی اور بھائی چارے کی فضا کو قائم رکھنے کیلئے وہ کر رہے ہیں۔ موجودہ وقت میں مسلکی و مذہبی منافرت پھیلانے والے ہمارے بد ترین دشمن ہیں اور علاقہ کے معززین جس طریقے سے اس کے خلاف ہر محاز پہ لڑ رہے ہیں وہ قابل تحسین اور قابل تقلید ہے۔
مفتی اعظم نے ان محلہ جات کے معززین کا دل کی عمیق گہرائیوں سے شکریہ ادا کیا جو باہمی اتحاد اور اتفاق کی فضا کو قائم رکھے ہوئے ہیں۔ کیوں کہ ان کی کوششوں اور کاوشوں کے نتیجے میں آج یہ علاقے مذہبی و مسلکی منافرت سے پاک وصاف ہیں۔مفتی اعظم نے تمام لوگوں سے اپیل کی ہے کہ وہ بھائی چارے کی فضا کو ہر محاز پہ قائم و دائم رکھیں اور اسکے خلاف ہونے والے سازشی عناصر کو بے نقاب کریں جو اپنے حقیر مقاصد کے لئے علاقے کے معزز اور ذی عزت لوگوں کو بدنام کر کے اپنے مکروہ عزائم کا نشانہ بنا رہے ہیں۔