سری نگر، 4 مارچ : دلی میں دو روز قبل اپنے ہی کمرے میں مردہ پائے جانے والے سری نگر کے باغات علاقے سے تعلق رکھنے والے نوجوان کے اہلخانہ کا الزام ہے کہ ان کے بیٹے کا قتل ہوا ہے۔ انہوں نے دلی پولیس اس سلسلے میں تحقیقات کرنے کی اپیل کی ہے۔
بتادیں کہ باغات سری نگر سے تعلق رکھنے والے 28 سالہ عاقب رشید بٹ ولد عبدالرشید بٹ کو دلی میں اپنے کمرے میں 2 مارچ کی شام مردہ پایا گیا تھا۔
اہلخانہ کا کہنا ہے کہ عاقب دلی میں دیگر تین ساتھیوں جن میں سے دو کشمیری ہیں، کے ساتھ ایک کمرے میں رہائش پذیر تھا۔
متوفی کے ایک رشتہ دار نے میڈیا کو بتایا: ’میں خود دلی میں ہی رہائش پذیر ہوں یہ واقعہ جنگ پور علاقے میں پیش آیا‘۔
انہوں نے کہا کہ مجھے متوفی کے ایک دوست نے رات کے ساڑھے دس بجے فون پر یہ اطلاع دی اور جب میں جائے موقع پر پہنچا تو اس کی موت واقع ہوئی تھی۔
متوفی نوجوان کے والد عبدالرشید بٹ کا کہنا ہے کہ میرے بیٹے کا قتل ہوا ہے اور اس میں تحقیقات ہونی چاہئے۔
انہوں نے کہا: ‘میں نے محنت کرکے اور بینک سے قرضہ لے کر غریبی میں اپنے بیٹے کو پڑھایا تھا لیکن اب کوئی باپ اپنے بیٹے کو باہر پڑھنے کے لئے نہیں بھیجے گا‘۔
انہوں نے دلی پولیس سے اس کیس میں تحقیقات کرنے کا مطالبہ کیا تاکہ سچائی کو سامنے لایا جاسکے اور ملوثین کو سزا دی جاسکے۔
یو این آئی