سری نگر،24 فروری : جنوبی کشمیر کے ضلع اننت ناگ کے سری گفوارہ علاقے کے جنگلات میں سیکورٹی فورسز اور جنگجوؤں کے درمیان بدھ کی صبح چھڑنے والے تصادم میں 2 جنگجو مارے گئے ہیں۔
کشمیر زون پولیس کے انسپکٹر جنرل وجے کمار نے بتایا کہ اننت ناگ کے سری گفوارہ علاقے کے شال گل جنگلات میں جاری تصادم میں دو جنگجو مارے گئے جن کی شناخت ابھی معلوم نہیں ہوسکی ہے۔
انہوں نے کہا کہ یہ کافی گھنا جنگل ہے تاہم سیکورٹی فورسز نے جنگجوؤں کو محاصرے میں لینے میں کامیابی حاصل کی۔
دریں اثنا کشمیر زون پولیس نے اپنے آفئشل ٹویٹر ہینڈل پر اس تصادم کے بارے میں جانکاری فراہم کرتے ہوئے ایک ٹویٹ میں کہا: ’اننت ناگ انکوائنٹر اپ ڈیٹ:2 عدم شناخت جنگجو ہلاک، آپریشن جاری’۔
قبل ازیں سرکاری ذرائع نے بتایا کہ جنگجوؤں کے چھپنے کی اطلاع موصول ہونے پر فوج کی 3 آر آر، سی آر پی ایف اور پولیس کی ایک مشترکہ ٹیم نے بدھ کی صبح ضلع اننت ناگ کے سری گفوارہ علاقے کے شال گل جنگلات کو محاصرے میں لے کر تلاشی آپریشن شروع کیا۔
انہوں نے بتایا کہ جوں ہی تلاشی آپریشن کی ایک ٹیم مشتبہ جگہ کے نزدیک پہنچی تو وہاں چھپے جنگجوؤں نے ان پر اندھا دھند فائرنگ شروع کر دی جس کے نتیجے میں طرفین کے درمیان تصادم چھڑ گیا۔
دریں اثنا حکام نے بنا بر احتیاط پورے ضلعے میں موبائل انٹرنیٹ خدمات معطل کر دی ہیں۔
یو این آئی