سرینگر، دسمبر 12: جموں و کشمیر کے مفتی اعظم اور مسلم پرسنل لاء بورڈکے چیر مین مفتی ناصرالاسلام نے کشمیر کے معروف عالم دین مولانا نور احمد ترالی کی وفات پر گہرے رنج و غم کا اظہار کیا ہے ۔
مفتی اعظم نے اپنے بیان میں کہا کہ مولانا نور احمد ترالی اتحاد ملت کے ایک سرکردہ رکن تھے ۔ سیاسی اور مذہبی حلقوں میں ان کی ایک پہچان تھی اور لوگ انہیں قدرو منزلت کی نگاہ سے دیکھتے تھے ۔ مفتی اعظم نے مزید کہا کہ مرحوم لوگوں میں اپنے اعلیٰ اخلاق وعلمی بصیرت کی بناء پر مقبول ہونے کے ساتھ ساتھ ہر دل عزیز بھی تھے ۔ موصوف کا انتقال ایک عظیم نقصان ہے جس کو پُرکرنا بہت ہی مشکل ہے ۔ سوگوار خاندان اور ترال کے عوام سے مفتی اعظم نے اظہار تعزیت کرتے ہوئے کہا کہ میں ذاتی طور پر اس صدمے میں لواحقین کے غم میں شریک ہوں اور اللہُ تعالی سے دُعا ہے کہ مرحوم کو جنت الفردوس میں اعلیٰ مقام عطا کرے اور لواحقین کو یہ صدمہ برداشت کرنے کی توفیق ہو۔
مفتی اعظم کی ہدایت پر آج مسلم پرسنل لاء بورڈ کا ایک ہنگامی اجلاس سرینگر میں طلب کیا گیا ۔ جس میں مرحوم کو شاندار الفاظ میں خراج عقیدت پیش کیا گیا۔