سرینگر،: بھارت نے بدھ کی شام کو چندریان 3 کو چاند کی سطح پر سافٹ لینڈنگ کو کامیابی کے ساتھ انجام دیتے ہوئے تاریخ میں اپنا نام درج کر لیا ہے۔
مشن کا وکرم لینڈر 23 اگست کو ہندوستانی وقت کے مطابق 18:02 بجے چاند کے جنوبی قطبی علاقے میں اترا، جو ہمارے عظیم ملک اور دنیا کے لئے ایک غیر معمولی کامیابی ہے۔
یہ غیر معمولی کامیابی بھارت کو چاند کے جنوبی قطبی علاقے میں کامیاب لینڈنگ حاصل کرنے والا پہلا ملک بناتی ہے، جو خلائی تحقیق کے میدان میں ایک اہم سنگ میل ہے۔
جموں و کشمیر میں کامیاب لینڈنگ کی خبر ہر کونے میں پہنچتے ہی خوشی کی لہر دوڑ گئی۔ وادیوں سے لے کر پہاڑوں کی چوٹیوں تک، لوگ اپنے ٹیلی ویژن سیٹس سے چپکے رہے اور اس حیرت انگیز کارنامے کو دیکھ رہے تھے۔ مرکز کے زیر انتظام جموں و کشمیر میں خصوصی اسکریننگ کا بھی اہتمام کیا گیا تھا۔
سری نگر کے راج بھون میں لینڈنگ کی براہ راست اسکریننگ کے ذریعے اس سنگ میل کی کامیابی کا جشن بھی منایا گیا۔ لیفٹیننٹ گورنر منوج سنہا کے ساتھ چیف سکریٹری اور جموں و کشمیر انتظامیہ کے دیگر سینئر افسران نے اس تاریخی تقریب کا مشاہدہ کیا۔ لیفٹیننٹ گورنر نے اسرو اور اس کی پوری ٹیم کو بھی دلی مبارکباد پیش کی جنہوں نے چندریان -3 مشن کی کامیابی کے لئے انتھک کام کیا ہے۔
محکمہ اطلاعات و تعلقاتِ عامہ (ڈی آئی پی آر) نے بھی اس شاندار کارنامے کی تقریبات میں شرکت کی اور اس تاریخی واقعہ کی براہ راست اسٹریمنگ کا اہتمام کیا۔ چندریان -3 کی اس کامیاب لینڈنگ کو دیکھنے کے لئے محکمہ کے سینئر افسران ، عہدیدار اور عملے کے ارکان جمع ہوئے۔
اس تاریخی دن پر ڈی آئی پی آر نے بھی اسرو اور اس کی پوری ٹیم کو اس قابل ذکر اور تاریخی کارنامے کے حصول کے لئے مبارکباد پیش کی۔ یہ کامیابی نہ صرف عالمی سطح پر ہندوستان کی سائنسی صلاحیتوں کو ظاہر کرتی ہے بلکہ ملک کے لوگوں ، خاص طور پر جموں و کشمیر کے شہریوں کے لئے بے حد فخر کے لمحے کی نمائندگی کرتی ہے۔ جیسے جیسے ہم آگے بڑھ رہے ہیں، ہندوستان خلائی تحقیق کے میدان میں اور بھی بڑے سنگ میل حاصل کرنے کے لئے تیار ہے، جس میں جدت طرازی اور ترقی کا جذبہ شامل ہے۔
