تحریر منتظر مومن وانی
بہرام پورہ کنزر
رابط:6006952656
؎علم کے دریا سے نکلے غوط زن گوہر بدست
واۓ محرومی !خزف چین لب ساحل ہوں میں
(بانگ درا)
یمو علمکس سمندرس غوط دژ تمو کھال لعل تمہ منزاتھ سلسلس منز چھ میہ پننہ محرومی ہند سخ دکھ بہ رودس سدر بٹھس پیٹھ تماشا وچھان یمو سدرس منز ڈنگی دژ تمو لوب سیھٹاہ تھزر ییلہ زن بہ (علامہ)امہ حالت وکیفیت نشہ محروم رودس۔
کایناتس چھ تالیم ہند کن تمے دوہ لوگمت ییلہ لفظ اقرا عالمس منز علی الاعلان باو نہ آٶ۔تالیم ہیچھن تہ ہیچھناون ییہ چھ اکھ سہ عمل یس روحس پرسوز ماحول بخشت زندگی ہند سینر ووگنیار نشہ زانیاب چھ کران ۔تالیم دپتھ گو پنن وجود فراری دنیا منز کڈتھ اخلاقی سطحس پیٹھ مولہ ناون۔اکھ نوجوان یس تالیم پراوان چھ یا علم حاصل کران چھ کیا سہ تالیم چھا انسانی ضمیرس شیرپارء کران؟امہ کتھ ہنز فکر چھ اقبال صابنس تخیلس منز غوطہ ماران ۔گوڈ چھ ییہ کتھ سونہ اچھرو درج کرن لائق ز علم چھ کائناتک روح۔روح یکطرف تھاوتھ چھ کائنات مردء۔اوے چھ اسلام تہ کائناتس یمہ کتھ نش باخبر کران ۔
طلب العلم فریضة علے کل مسلم
تالیم ہند گاش ستی لوب جانور صفت لوکو تہ حقیقی منزلک پے لولک ،انسانیتک تہ ملژارک مقام گوو تہندین سینن منز درج ۔پز تالیم تہ حقیقی علم ونو تتھ یس انبہین ولین تہ بزرگن ہنز زندگی منز اوس تکیاز تمہ تالیمہ ستی کڈ تمو انسانیت جہالت کہ گٹہ زلہ منز نیبر تہ اکھ صالح معاشرک کن آٶ وجودس۔وآران چمن آٶ سگونہ تہ مشکن دار پھیر پورء عالمس ۔تالیم ہند تھزر ستی کور انسانن عرشس تہ فرشس پیٹھ پننہ اشرف المخلوقات آسنک دعوا۔
ییہ کتھ چھ حقیقتکس آسمانس پیٹھ تارکن ہندی پاٹھی زوتان ز تالیم چھ رب سند نور تہ امہ نورک طالب چھ حقیقی مجاہد۔اوے چھ علمک طلبگار تمہ مقامک مالک یس مقام عرشس ستی بوزتھ چھ کھیوان۔تالیم چھ سہ ہتھیار یمہ کہ بدولت انسان زندگی ہندین طیشل حقیقژن ستی چشمہ رلاوتھ امن ہند مقابلہ چھ کران۔حضور ﷺ فرموو علم کریو حاصل منزلہ پیٹھ قبر تام امیک مطلب گوو ز اکس انسانس چھ وومر وومران علمکس طلبس منز زانوۓ طلب روزن پیوان۔اوے چھ داناۓ دہرو مفکرو تہ دانشورو ییہ کتھ پننس مزازکس انہ پٹس پیٹھ درج کرمژ ز تالیم چھ خوفتہ دلن ووزناونچ اکھ واحد عمل۔بےعلم انسان چھ کائناتس منز دکن تہ ٹھونچن لگتھ پرژھین گژھان۔اوے چھ شیخ سعدی تہ یہیء حقیقت دائراون۔
؎چوں شمع از پئے علم باید گداخت
کہ بے علم ناتواں خداراشناخت
ڈاکٹر اقبال ییتہ اکس جوانس زندگی ہندیو تمام وارداتو نشہ حیسہ چھ تھاوان تتہ چھ یمہ کتھ نش تہ امس زانیاب کران ز چون وجود صیح قالبس برنہ خاطر چھ تالیم اکھ مکمل تہ کن طرز عمل۔یمہ کہ عوض ژ زندگی ہندیو حقیقژو نش مچھ روزکھ نہ کینہہ ۔اکھ انسان چھ علم کہ ذریعہ تمام مصائبن برونہہ کنہ مردانگی ہند اظہار کران۔تالیم ستی چھ انسانی شعورس درر میلان تہ عقل چھ باوزن بننان۔
؎علم وحکمت رہزنِ سامانِ اشک وآہ ہے
یعنی اک الماس کا ٹکڑا دل آگاہ ہے
( بانگ درا)
علم وحکمت چھ اوشس تھپ دنہ وول ۔گویا بیدار دل چھ اکھ لعلک ٹکرء۔علم وحکمت نش باخبر انسان چھ پرتھ غمہ وز ووش تراوانہ نش بچان تکیاز تمس چھ ییہ فہم آسان ییہ اوسم تقدیرس لیکتھ۔
علم چھ مرد دل انسانس تتھے کنی زو دوان یتھ کنی رود چھ ددمتس زمینس تراوتھ دوان ۔اوے گھ علم اکھ سہ کل یس دل ودماغکس زمینس منز رووتھ انسان عقلہ ہند پھل چھ حاصل کران۔تالیم چھ سہ دیوی یمچ ژھاۓ پیتھی اکھ نفر انسان چھ بنان۔حضور ﷺفرموو اکھ عالم شخصس چھ شیطانس پیٹھ ساسہ بدیو عابدو کھوتہ سخت تر تہ عالمس چھ عابدس پیٹھ یتھے کنی فضیلت یتھ کنی ژوداہمہ زونہ تاکن پیٹھ چھ تکیاز عالم چھ انبہین ہند وارث ۔انبہین ہنز وراثت نہ چھ دینار تہ نہ درہم بلکہ علم۔اوے چھ حضور مدنی ﷺسنز کتھ دلکین دیوارن لیکھن لائق۔العالمہ افضل من عبادة الجاھل۔عالمہ سنز نیندر چھ جاہلہ سنز عبادت نش بہتر۔
اقبال چھ امےعلمک طلبگار آسنس ستی ستی نوجوانن تہ ییہ پیالہ چینک تلقین کران۔
؎علم کی سنجیدہ گفتاری ،بڑھاپے کاشعور
دینوی اعزاز کی شوکت،جوانی کا غرور
(بانگ درا)
علم حاصل کرنہ ستی چھ انسانس منز سنجیدگی پادء گژھان پتہ چھ بجرک احساس تہ انسانس سنجید بناوان،ییلہ زنہ دنیاوی آسن باسن تہ جوانی ہند رعب دار بناوان۔
علم چھ اکھ سہ دولت یس کائنات کین اسرارن نش انسانس واقفیت چھ بخشان۔علم چھ اخلاقی قدرن سام ہیتھ انسانس فرشتن پیٹھ برتری دوان ۔ییہ چھ علمکے طاقت یس آسمانی سرن وورن تلتھ اسہ پالنہار سنز تخلیق ہند پے چھ دوان ۔امام غزالی چھ اتھ بارس منز وننان ز یمس شخصس علم حاصل کرنچ کل آسہ سہ گژھ گوڈ یتھ کتھ سام ہیون ز علم حاصل کرنک کیا مقصد چھ تمس اگر سہ ہاٶ بھاو خاطر چھ پران تیلہ تھاون سہ یاد سہ چھ پنن دشمن اور اگر علمہ ستی جہالت دور کرن بیاکھ پرزناون تہ رب سنز رضا مقصد چھس تہ نیبرم ہاٶ بھاٶ نہ کہینہ تیلہ سبحان اللہ۔امے کتھ ہنز فکر چھ ڈاکٹر اقبال صابس تہ رمس رمس منز بستھ۔دنیاوی علم یتہ اقبال ضروری ہیچھن قرار چھ دوان تتہ چھ سہ اسلامی علومن نش زانیاب گژھن ضروری مانان ۔اقبال چھ جوانن منز تمہ علمچ ضرورت محسوس کران یس علم انسانی نظرن موکجار عطا کر تہ یمہ ستی انسانی بصارت تہ بصیرت بالغ ہیکہ سپدتھ۔
؎وہ علم اپنے بتوں کا ہے آپ ابراہیم
کیا ہے جس کو خدا نے دل و نظر کا ندیم
زمانہ ایک ،حیات ایک ،کائنات بھی ایک
دلیل کم نظری قصہ جدید وقدیم
چمن میں تربیت غنچہ ہو نہیں سکتی
نہیں ہے قطرہ شبنم اگر شریک نسیم
وہ علم،کم بصری جس میں ہم کنار نہیں
تجلیات کلیم و مشاہدات حکیم
(ضرب کلیم)
یس علم اللہ تعالی دل ونظر باپتھ یار چھ بناوان سہ علم چھ پانے بتن ہنز تباہی باپت حضرت ابراہیم ؑ۔حضرت ابراہیمن ژھن کعبک ساری بت پٹھراوتھ ۔اتیہ ہیکو یہیے کتھ ونتھ ز دلی جذبہ تہ بصیرت کہ علمہ ستی چھ انسان سند عقید تہ عملہ پختہ گژھان تہ گمراہ کرونیو تمام حربو نش چھ سہ محفوظ روزان۔زمانہ چھ اکھ تہ زندگی تہ چھ اکھ تہ کائنات تہ چھ اکھ ییلہ ییہ صورت حال چھ پرانہ تہ نوچ کتھ کرن غار شعوری کتھ۔امہ کیاز کرہوکھ تقسیم۔اگر شبنم قطر صبحکس واوس ساتھ دن نہ کہینہ تیلہ ہیکہ نہ باغس منز بامنن تربیت گژھت۔شبنم چھ بامنن پیٹھ پیوان سہ چھنہ توتام پھولان یوتام نہ صبحک واو نیر کتھ چھ واضح ز دنہیس منز عظمت تمہ علمہ ستی لبان یس دل ونظرء منز تہ بستھ آسہ۔سہ علم چھ جہالت تہ کم نظری برابر یس موسی کلیم اللہ سنز روشن ،صاحب عقل تہ فلسفی سنز مشاہد ونش دور آسہ۔دل ونظر وول علم چھ سراپا دین تہ جہالت کہ غلاظت نش چھ پاک۔یتھ کتھ ستی چھ ساری متفق ز یتھ جایہ آفتابچ پرو چھ پیوان تتھ جایہ چھ انہ گٹہ تہ پنن ڈھیر وہراون مگر یتہ علمک گاش نمودار چھ گژھان تتہ چھنہ جہالتک انہ گوٹ وومر وومران خاطرء نابود گژھان۔اقبال تہ چھ تتھ علمکس تلاشس منز یس جوانن تہ قومس باپتھ زند دلی ہند پاغام بنہ۔اقبال چھ تمہ علمہ نش ڈیکہ ژکرتھ کتھ کران یس دنیاوی ضرورژن باپتھ حاصل کرنہ ییہ ۔
؎خوش تو ہیں ہم بھی جوانوں کی ترقی سے مگر
لب خنداں سے نکل جاتی ہے فریاد بھی ساتھ
ہم سمجھتے تھے کہ لاۓ گی فراغت تعلیم
کیا خبر تھی کہ چلا آۓ گاالحاد بھی ساتھ
گھر میں پرویز کے شیریں تو ہوئی جلوہ نما
لے کے آئی ہے مگر تیشہ فرہاد بھی ساتھ
”تخم دیگر بکف آریم وبکار یم زنو
کانچہ کشتیم ز خجلت نتواں کرد درد“
(بانگ درا)
اسی اگرچہ نوجوانن ہنز ترقی نش خوش چھ وونی گوو اسہ ونی ہونجہ چھ اکھ فریاد تہ ووش تہ نیران۔اسہ اوس خیال ازچ تالیم واتناو اسہ سوکھ مگر اسہ اسی نہ خبر ییہ ز ییہ تالیم نییہ کفروالحادس کن۔اگرچہ پرویزنس گھرس منز شیریں ہنز جلوہ نمائی گییہ مگر ستی چھ تمی فرہادن لکر زالنک سامان (تیشہ)تہ ستی اونمت۔اگرچہ مسلمان گھرن منز تالیم ہند سلسلہ شروع گوو مگر اتھ منز چھ نوجوانن ہند ووجار گژھنک سامان تہ۔اسہ یس بیول وومت اوس سہ ووو اسہ نوء سر او موکھ ز ییہ اسہ وومت اوس۔شرمندگی ہند سببہ ہیوک نہ آسہ تمیک فصل ژٹتھ کہینہ اسہ پز تالیم ہند طریقہ بدلاون۔ اقبال چھ مکمل پاٹھی عظمت علمکہ زاوجار نش باخبر مگر سہ چھ جوانس تہ قومس نش علمچ باوتھ کران یس علم اخلاقی قدرن ہند پش پناہ آسہ۔اقبال چھ ووننان زاگرعلم نفسک تابع بنیاو تیلہ بنہ ییہ پورء معاشرء خاطر زوال تہ اگر ییہ علم دینک متبع بنیاٶ تیلہ چھ ییہ قومس باپتھ رحمت۔اگرچہ موجود زمانس منز تالیم ہند زور پرتھ شہرس تہ پرتھ مادانس منز چھ مگر توتہ چھ پرتھ کانہہ انسان واویلا کران۔کس تام دگ چھ قومس روح وقرارس علم پر پر تہ ستاوان۔ڈگری پراوتھ تہ چھ ازیک جوان مغربی شاندس پیٹھ شونگ تراوتھ تہنز غولامی ہند شکار گومت۔مغربکین فریبن تہ فندن منز بند گومت ییہ جوان چھنہ قومس کنہ اندء تہ اتھ روٹ کرنک مزاز تھاوان۔
؎حرارت ہے بلا کی بادہ تہذیب حاضر میں
بھڑک اٹھا بھبو کا بن کےمسلم کاتن خاکی
کیاذرہ کوجگنودےکےتاب مستعار اس نے
کوئی دیکھے تو شوخی آفتاب جلوہ فرماکے
نۓ انداز پاۓ نوجوانوں کی طبعیت نے
یہ رعنائی،یہ بیداری،یہ آزادی،یہ بیباکی
تغیر آگیا ایسا تدبر میں،تخیل میں
ہنسی سمجھی گئی گلشن میں غنچوں کی چگر چاکی
کیا گم تازہ پروازوں نے اپنا آشیاں لیکن
مناظر دل کشا دکھلا گئی ساحر کی چالاکی
حیات تازہ اپنے ساتھ لائی لزتیں کیاکیا
رقابت،خودفروشی،ناشکیبائی،ہوسناکی
فروغ شمع نوسے بزم مسلم جگمگا اٹھی
مگر کہتی ہےپروانوں سے میری کہنہ ادراکی
”تو اےپروانہ!ایں گرمی ز شمع محفلےداری
چومن درآتش خود سوز اگر سوز دےداری“
(بانگ درا)
ازکس تہذیب کس شرابس منز چھ حدکھوتہ زیادء تژر۔امہ ستی چھ مسلمان سندس جسمس نارک پاٹھی بریہہ ووتھان۔یورپی تہذیبن کور جوان سخ وولٹہ اندازس منز متاثر امہ سند ووتھن بہین بنیاٶ غار اسلامی۔ییہ تہذیب اپناوتھ چھ مسلم نوجوان ہندس مزازس منز نوی طریقہ پادء گامت۔تہ زن گوو نیبرم خوبصورتی چمک دمک مالس ماجہ ہند بیمہ نش آزادی تہ یژھا ییلہ گی زءامن چھنہ زٹھن ہند حیہک کانہہ خیال۔امن جوانن ہندس سوچس منز ییژھا تبدیلی ز تمہ چھ باغس منز بامنن ہندس جگر چاک گژھنس پیٹھ اسناہ کران ۔امن چھنہ بییہ سند تکلیفک کانہہ احساس۔از کلکہ تہذیبک نوو نوو شوق تھاون والیو جوانو بدلوو پننہ گھرک ماحولے برندس منز۔مگر جادوگر سنز چالاکی ہاو امن دل رنزناون واجین منظر کشی ۔یمہ تہذیبکہ ظاہری رنگہ واہ وہن کرءسانی نوجوان زیادیہ دیوان۔نویہ تہذیبچہ زندگی اون بیون بیون میچھر پانس ستی مثالے اکھ اکس ستی دشمنی تہ کینہ ،گھمنڈی تہ بے صبری۔نوی شمع یعنے تہذیب حاضرکہ پرزلینہ ستی گیہ بزم مسلم یکدم تھودوتتھ مگر امن ژانگکین پونپرن یعنی مسلم جوانن چھ میانی عقل ییہ ووننان ز اےپونپرء!ییہ چانی سرگرمی چھ ووپر محفلہ یعنے مغربی تہذیب نش ووزم انمژ،اگر چانس دلس منز کانہہ لوے خوے چھ تیلہ زال پننس نارس منز پنن وجود۔یعنے مغربی تہذیب نش ہیہ لوب تہ اسلامی تعلیمات تہ روایاتن پیٹھ گژھ عمل پیرا۔اقبال صاب ییتہ جوانس علمی اوپ ژوپ کرنس منز محو عمل چھ تتہ چھ سہ امس یمہ کتھ ہنز ژینہ ون دوان ز مغربی تہذیب کس میچھرس منز چھ زہر ولتھ۔یس زہر جوانس رمس رمس منز وستھ تمہ سندس وجودس ترپچہ ترپچہ چھ کران۔اقبال چھ جوانس باپتھ وچھمتس خوابس سہ تابیر ژھاران یس کائناتس زند دلی ہند پاغام بنہ۔اقبال چھ جوانس تمہ علمچ تہ ژینہ ون دوان یس علم انسانس منز امامتک وصف پاد کر تہ اقبال چھ علمک تھزر وزوزگاشراوان۔
؎علم کی سنجیدہ گفتاری،بڑھاپے کا شعور
دنیوی اعزاز کی شوکت ،جوانی کا غرور
(بانگ درا)
تالیم حاصل کرنہ ستی چھ انسانس منز سنجیدگی پاد گژھان ییتہ چھ بُجرک احساس تہ انسانس سنجید بناوان ییلہ زن دنیاوی عزتک شان وشوکت تہ جوانی ہند غرور امس رعب داربناوان چھ۔اقبال یتہ تالیم ہند پاپرجائی باپتھ فکر مند چھ تتہ چھ تمس مغربی تالیم تہ امیک اثر جوانن پیٹھ امہ کتھ ہند تہ احساس ژینان۔مغربی تالیم گژھ نہ جوانس اخلاقی لباس کڈتھ انسانی مادانس منز عریاں کرن۔
؎تالیم مغربی ہے بہت جرت مند
پہلا سبق ہے،بیٹھ کے کالج میں ماڈلینک
(بانگ درا)
مغربی تالیم چھ سیٹھاہ جرت پاد کرونی امیک گوڈنیک سبق چھ یہوی ز ییلہ کالجس منز پانہ ونی سمکھیو خوب مسخرل گژھ کرنی۔اقبال چھ دور جدیدچہ طرز تالیم کٹھ کڈتھ امیکہ بے اثر آسنک تہ درس دوان۔تمہ سندین نظرن منز چھ ازیک مکتب علمی روح نش بلکل بیون ۔دور جدیدچ حالت وچھتھ چھ باسان ییہ تالیم چھنہ کنہ تہ رنگہ اخلاقی بیمارین کاپہ رٹنس منز کامیاب۔