سرینگر: جموں کشمیر کے مفتی اعظم اور مسلم پرسنل لاء بورڈ کے چیئرمین مفتی ناصر الاسلام نے جمعہ کے روز جموں صوبے کی مرکزی جامع مسجد کنز الایمان کریانی تالاب نروال جموں میں ایک عظیم اجتماع سے خطاب کرتے ہوئے معراج النبی ﷺ کے واقعے پر روشنی ڈالی۔
مفتی اعظم نے کہا کہ معراج النبی ﷺ انسانی تاریخ کا سب سے عظیم واقعہ ہے، کیوں کہ یہ وہی رات تھی جس رات اللہ تعالی نے اپنے پیارے محبوب ﷺ کو ملاقات کے لئے اپنے پاس بلایا تھا۔ مفتی اعظم نے کہا کہ وقت کی اہم ضرورت ہے کہ ہم سیرت النبی ﷺ کا مطالعہ کریں اوراسے اپنی زندگی میں عملا کر موجودہ اور آنے والی زندگی میں اسکے ذریعے کامیابی حاصل کر سکیں۔ اسکے علاوہ سماجی برائیوں پر بھی مفتی اعظم نے روشنی ڈالی۔جس میں خاص طور پر آج کی نوجوان نسل کا نشے کی جانب بڑی تیزی سے راغب ہونا ہے۔
انہوں نے کہا کہ آج نوجوان طبقے کا نشے کے بڑے بے تحاشہ استعمال نے ہمارے سماج کو اندر سے کھوکلا کر دیا ہے۔اگر ہم اس زہر کو روکنے میں ناکام ہوئے تو وہ دن دور نہیں جب یہاں بھی ہر گھر میں ایک نشے کا عادی شخص ملے گا۔ انہوں نے علماء اور دیگر طبقہ ہائے فکر کے لوگوں سے بھی اپیل کی کہ وہ نئی نسل کو نشے کے نقصانات سے آگاہ کریں۔
مفتی اعظم کے ہمراہ مسلم پرسنل لاء بورڈجمو ں کے صوبائی صدر مفتی نذیر قادری،مولانا حاجی مظفر اور محمدطیب رضا قادری کے علاوہ دیگر ممبران بھی تھے۔