سری نگر، 16 نومبر : شمالی ضلع بارہمولہ کے اوڑی کے کمل کوٹ علاقے میں پیر کے روز فوج نے ایک پھٹنے سے رہ گئے گولے کو ناکارہ بنا دیا۔
بتادیں کہ اوڑی میں لائن آف کنٹرول پر کمل کوٹ اور حاجی پیر سیکٹروں میں جمعے کو ہندوستان اور پاکستان کی فوج کے درمیان شدید گولہ باری کا تبادلہ ہوا تھا جس کی وجہ سے آر پار بہت جانی و مالی نقصان ہوا تھا۔
سرکاری ذرائع نے بتایا کہ کمل کوٹ علاقے میں پیر کے روز صغیر حسین شاہ ولد نانگ علی شاہ کے رہائشی مکان کے نزدیک ایک پھٹنے سے رہ گئے گولے کو پایا گیا۔
انہوں نے بتایا کہ گولہ کو دیکھتے ہی بم ناکارہ بنانے والی ایک ٹیم کو جائے موقع پر طلب کیا گیا جنہوں نے گولے کو ناکارہ بنا دیا۔
دریں اثنا ایس ڈی پی او اوڑی نے واقعے کی تصدیق کرتے ہوئے کہا کہ فوج نے پھٹنے سے رہ گئے گولے کا ناکارہ بنا دیا اور اس موقع پر پولیس کی ایک ٹیم بھی موجود تھی۔
بعض میڈیا رپورٹس کے مطابق ہندوستان اور پاکستان کی فوج کے درمیان جمعے کی گولہ باری کے تبادلے کے واقعے کے بعد کمل کوٹ اور حاجی پیر علاقوں میں کئی ان پھٹنے گولے پڑے ہوئے ہیں۔
یو این آئی ایم افضل