سری نگر، 24 فروری: سری نگر کے ڈل گیٹ علاقے میں بدھ کے روز بلیوارڈ روڈ کا ایک حصہ اچانک کھسک کر شہرہ آفاق ڈل جھیل میں گر گیا۔
بڈیاری چوک ڈل گیٹ کے مقامی لوگوں اور تاجر پیشہ افراد نے یو این آئی اردو کے نامہ نگار کو بتایا کہ بلیوارڈ روڈ کا ایک حصہ بدھ کو دوپہر کے وقت اچانک کھسک کر ڈل جھیل میں جا گرا۔
انہوں نے بتایا کہ مصروف ترین بلیوارڈ روڈ کا ایک حصہ کھسکنے کے بعد متعلقہ محکموں کے اہلکاروں نے احتیاط کے طور پر قریب دو سو میٹر سڑک کے ایک حصے کو گاڑیوں کی آمدورفت کے لئے بند کر دیا۔
مقامی لوگوں اور تاجروں نے بتایا کہ حادثے کے وقت ایک موٹر سائیکل سڑک کے متاثرہ حصے پر کھڑا تھا تاہم حادثے میں کوئی زخمی نہیں ہوا۔
انہوں نے مزید بتایا کہ متعلقہ محکموں کے اہلکاروں نے جائے واردات کا دورہ کرنے کے بعد کہا کہ متاثرہ حصوں کو فوراً سے پیشتر ٹھیک کیا جائے گا۔
یو این آئی