سرینگر ، نومبر 20: جموں و کشمیر محکمہ اطلاعات و تعلقات عامہ (جے کے ڈی آئی پی آر) ایمپلائز یونین نے سینئر صحافی مدثر علی کے اچانک انتقال پر گہرے دکھ اور افسوس کا اظہار کیا ہے۔
مدثر آج صبح چرار شریف میں واقع گھر پر حرکت قلب بند ہونے سے سے انتقال کر گئے۔ وہ اس وقت انگریزی روزنامہ گریٹر کشمیر کے لئے کام کر رہے تھے اور قومی اور بین الاقوامی میڈیا تنظیموں کے ساتھ بھی وابستہ تھے۔
جے کے ڈی آئی پی آر نے اپنے تعزیتی بیان میں کہا ہے کہ ‘غم کی اس گھڑی میں ایمپلائز یونین سوگوار کنبہ کے ساتھ، خصوصی طور پر مدثر علی کے بھائی صحافی جہانگیر علی کے ساتھ ہمدردی کا اظہار کرتی ہے ۔ اللہ سوگوار خاندان کو یہ ناقابل تلافی نقصان برداشت کرنے کی توفیق عطا فرمائے۔’
دریں اثنا ، اس سلسلے میں ، جے کے ڈی آئی پی آر ایمپلائز یونین کے مرکزی صدر شبیر احمد بٹ کی زیر صدارت ایک تعزیتی اجلاس منعقد ہوا ، جس میں جوائنٹ ڈائریکٹر انفارمیشن آفس ، رام باغ ، سری نگر میں غم و افسوس کا اظہار کیا گیا اور اجلاس میں دعا کی گئی کہ اللہ تعالیٰ مرحوم کی روح کو اپنے جوار رحمت میں جگہ بخشے اور لواحقین کو صبر جمیل عطا فرمائے۔
جے کے ڈی آئی پی آر ایمپلائز یونین کے صدر شبیر احمد بٹ، نائب صدر بلال احمد راتھر کے ہمراہ مرحوم کے گھر گئے اور مدثر کے اہلخانہ، خاص طور پراس کے چھوٹے بھائی جہانگیر علی سے اظہار یکجہتی کی۔