پی ڈی پی کے محبوس یوتھ لیڈر وحید الرحمان پرہ کی پہلی جیت

سری نگر، 22 دسمبر : پی ڈی پی کے محبوس یوتھ لیڈر وحید الرحمان پرہ نے منگل کے روز ڈی ڈی سی حلقہ انتخاب پلوامہ اول سے جیت درج کی۔
انہوں نے 1323 ووٹ حاصل کرکے بی جے پی کے اپنے حریف سجاد احمد رینہ کو زائد از ایک ہزار ووٹوں سے شکست دےدی۔
بتادیں کہ وحید الرحمان پرہ کو 25 نومبر کو قومی تحقیقاتی ایجنسی (این آئی اے) نے ڈی ڈی سی انتخابات کے لئے کاغذات نامزدگی جمع کرنے کے پانچ روز بعد ہی گرفتار کیا تھا۔
پلوامہ کے نائیرو گاؤں سے تعلق رکھنے والے وحیدا لرحمان اس وقت جموں کے امپھالہ جیل میں بند ہیں۔
دریں اثنا پی ڈی پی صدر اور سابق وزیر اعلیٰ محبوبہ مفتی نے وحید الرحمان پرہ کو جیت حاصل کرنے پر مبارک باد پیش کرتے ہوئے اپنے ایک ٹویٹ میں کہا: ’پی ڈی پی کے وحید الرحمان پر فخر محسوس کر رہی ہوں جنہوں نے اپنے پہلے الیکشن میں ووٹوں کی بڑی تعداد سے شاندار جیت حاصل کی باوجودیکہ انہیں کاغذات نامزدگی جمع کرنے سے قبل بے بنیاد الزامات کے پاداش میں گرفتار کیا گیا۔ لوگوں نے وحید کے لئے اپنے محبت اور اعتماد کا اظہار کیا ہے۔ امید ہے کہ انصاف سایہ فگن ہوگا‘۔
وحید الرحمان پرہ نے اس سے قبل کسی بھی الیکشن میں امیدوار کی حیثیت سے حصہ نہیں لیا ہے یہ ان کا بحیثٰت امیدوار پہلا الیکشن بھی تھا اور پہلی جیت بھی تھی۔
جس ڈی ڈی سی انتخابی حلقے سے انہوں نے جیت حاصل کی اس میں ان کے علاوہ چھ امیدوار میدان میں تھے جن میں سے بی جے پی کے سجاد احمد رینہ، جموں وکشمیر اپنی پارٹی کے غلام حسن میر اور چار آزاد امیدوار تھے تاہم ٹکر وحید اور سجاد رینہ کے درمیان ہی تھی۔
یو این آئی