نوجوانوں کی مہارتوں کے عالمی دن کے موقع پر مرکزی وزیر راجیو چندر شیکھر نے برطانیہ کو برآمد کے لئے نامدا آرٹ مصنوعات کی پہلی کھیپ کو ہری جھنڈی دکھائی
نامدا پروجیکٹ وزیر اعظم نریندر مودی کے وژن کا عکاس ہے : وزیر مملکت چندر شیکھر
نئی دہلی، جولائی 14: پردھان منتری کوشل وکاس یوجنا (پی ایم کے وی وائی) کے حصے کے طور پر اسکل انڈیا کے پائلٹ پروجیکٹ کے تحت کشمیر کے نامدا کرافٹ کو کامیابی کے ساتھ بحال کیا جا رہا ہے، جس میں اب تک جموں و کشمیر کے چھ اضلاع سے تقریباً 2200 امیدوار اس ختم ہورے فن میں تربیت حاصل کر رہے ہیں۔
مرکزی وزیر مملکت برائے ہنرمندی اور انٹرپرینیورشپ اور الیکٹرانکس اور آئی ٹی راجیو چندر شیکھر نے آج برطانیہ کو برآمد کے لئے نامدا آرٹ مصنوعات کی پہلی کھیپ کو ہری جھنڈی دکھائی۔
یہ منصوبہ ہنرمندی کی ترقی کے شعبے میں پبلک پرائیویٹ پارٹنرشپ ماڈل کی ایک عظیم مثال قائم کرتا ہے کیونکہ اسے مقامی صنعت کے شراکت داروں کے تعاون سے نافذ کیا جارہا ہے۔
اس اقدام کے تحت تقریباً 2200 امیدواروں کو نامدا کرافٹ کے فن میں تربیت دی گئی ہے ، جو اس روایتی دستکاری کے تحفظ اور مقامی کاریگروں کو بااختیار بنانے میں ایک اہم سنگ میل کی حیثیت رکھتا ہے۔ اس پروجیکٹ کے تحت کشمیر کے چھ اضلاع سرینگر، بارہمولہ، گاندربل، بانڈی پورہ، بڈگام اور اننت ناگ میں ہنرمند لوگوں کو کامیابی سے تربیت دی گئی ہے۔
وزیر اعظم نریندر مودی کی دور اندیش قیادت میں ہندوستان کے نوجوانوں کو ہنر مند بنانے کے لئے حکومت کا عزم ثابت قدم ہے۔ میر دستکاری اور سرینگر کارپٹ ٹریننگ اینڈ مارکیٹ سینٹر جیسے مقامی صنعتی شراکت داروں کی مدد سے جموں و کشمیر میں اس پائلٹ پروجیکٹ کا کامیاب نفاذ ہنر مندی کی ترقی کو آگے بڑھانے اور معاشی ترقی کے لئے سرمایہ کاری کو راغب کرنے میں پبلک پرائیویٹ پارٹنرشپ کی طاقت کی مثال ہے۔
ہنرمندی کی ترقی اور انٹرپرینیورشپ کی وزارت کے وزیر مملکت راجیو چندر شیکھر نے اس کامیابی پر مبارکباد دیتے ہوئے کہا کہ ہم نے 2021 میں نامدا پروجیکٹ متعارف کرایا تھا اور اس کا نتیجہ ہمارے وزیر اعظم کے نئے بھارت، نئے اوسر، نئی سمریدھی کے وژن سے پوری طرح مطابقت رکھتا ہے جس میں اس بات پر زور دیا گیا ہے کہ ہنر مندی کا مطلب نئے مواقع اور نئی خوشحالی پیدا کرنا ہے۔ دستکاروں اور دستکاری سیکٹر اسکل کونسل کی اس بڑی کوشش کے ایک چھوٹے سے حصے کے طور پر، میں آپ سبھی کو اس فن کی زبردست کامیابی اور خوشحالی کی خواہش کرتا ہوں، اور یہ سنگ میل حاصل کرنا ہمارے لئے فخر کا لمحہ ہے۔
انہوں نے کہا کہ نامدا پروجیکٹ وزیر اعظم نریندر مودی کے اسکل انڈیا کے وژن کا انتہائی اطمینان بخش اور فیصلہ کن نتیجہ ہے جو لوگوں کو بااختیار بنانے اور مواقع پیدا کرنے کے بارے میں ہے۔ 2021 میں راجیو چندر شیکھر نے جموں و کشمیر کا دورہ کیا۔ اپنے دورے کے بعد انہوں نے خطے میں ختم ہورے روایتی دستکاری کے تحفظ اور بحالی کے لئے ایک پروجیکٹ منعقد کرنے کی ضرورت کا اظہار کیا کیونکہ دستکاری کا شعبہ یہاں کی معیشت میں ایک اہم حصہ ہے۔
نامدا کرافٹ عام بنائی کے عمل کے بجائے فیلنگ تکنیک کے ذریعے بھیڑ وں کی اون سے بنا قالین ہے۔ خام مال کی کم دستیابی، ہنرمند افرادی قوت اور مارکیٹنگ تکنیک کی کمی کی وجہ سے اس کرافٹ کی برآمد میں 1998 سے 2008 کے درمیان 100 فیصد کمی آئی تھی۔ لہٰذا، پی ایم کے وی وائی کے تحت اس خصوصی پروجیکٹ کے ذریعے، ہنر مندی کی ترقی اور انٹرپرینیورشپ کی وزارت نے اس خطرے سے دوچار ہنر کو محفوظ رکھنے کے لئے قلیل مدتی تربیتی نصاب تیار کیا ہے۔
اس منصوبے کو تربیت کے 3 مراحل میں 25 گروپوں میں لاگو کیا گیا۔ ہر تربیتی پروگرام تقریباً ساڑھے تین ماہ کا تھا ، جس کے نتیجے میں سائیکل تقریباً 14 سے 16 ماہ میں مکمل ہوا۔
نامدا پروجیکٹ ایک صنعت پر مبنی تربیتی پروگرام ہے جس میں نامدا کرافٹس پروڈکشن سے مستفید ہونے والے افراد شامل ہیں جو کشمیر میں نامدا کرافٹ سے وابستہ ورثے کے تحفظ اور بحالی میں اپنا کردار ادا کریں گے۔ اس سے کشمیر میں نامدا کرافٹس کلسٹر کے موجودہ کاریگروں کی رسائی میں بھی بہتری آئے گی اور ان کے روزگار کے امکانات میں بہتری آئے گی۔
